मधेशका २२ जिल्लाको प्रदेश बनाउन संघर्ष जारी छ : जसपा नेपाल अध्यक्ष यादव

जनता समाजवादी पार्टी (जसपा) नेपाल अध्यक्ष उपेन्द्र यादवले तराई–मधेसका २२ जिल्लाको प्रदेश बनाउन संघर्ष जारी रहेको बताएका छन् । सप्तरीको राजगढ गाउँपालिका–४ स्थित बेल्ही चपेनामा आइतबार आयोजित चुनावी छलफल तथा भेटघाट कार्यक्रममा बोल्दै अध्यक्ष यादवले आठ जिल्लाको मधेस प्रदेश बनेको भए पनि २२ जिल्लाको एउटै प्रदेश बनाउने संघर्ष यथावत रहेको बताए ।
पूर्वउपप्रधानमन्त्रीसमेत रहेका अध्यक्ष यादवले भने, ‘देशमै पहिचानमा आधारित प्रदेश मधेश मात्र हो, अब २२ जिल्लाको मधेश निर्माण गर्नका लागि जसपा नेपाल बलियो शक्ति भएर उदाउनु जरुरी छ ।’ उनले सीमान्तकृत, बहिष्कृत, शोषित, अपमानित, पछाडि पारिएका समुदायको अधिकार, पहिचान, शासन सत्ता, शक्ति, स्रोतसाधनमा अवसर न्याय र समानताका लागि नै मधेस विद्रोह भएको उनको भनाइ थियो। मधेश विद्रोहकै कारण राज्यका अंगमा महिलाको ३३ प्रतिशत सहभागिता सुनिश्चित भएको बताउँदै यादवले भने, ‘नेपालको जस्तो महिलाको भागिदारी चीन, अमेरिका, जापान, बेलायतमा समेत छैन, यी सबै परिवर्तन जनविद्रोहबाटै सम्भव भएको हो ।’

सङ्घीयता विरोधी शक्तिहरूले मधेशी, महिला, दलित, आदिवासी, जनजाति, थारूलगायत पछाडि पारिएका समुदायले प्राप्त गरेको अवसर र प्रतिनिधित्व खोस्नका लागि उद्धत रहेको उनको आरोप थियो। प्रदेशलाई अधिकारै नदिएर काम गर्न नसकेको, खर्चिलो भयो जस्ता गलत भाष्य निर्माण भइरहेकोले त्यस्ता भ्रममा नपर्न उनले आग्रह गरे ।

अध्यक्ष यादवले भने, ‘कांग्रेस कम्युनिस्टले मधेसीलगायत शोषित उत्पीडित जनताको हक अधिकार, पहिचान र सम्मान नदिँदा हामीले मधेस विद्रोहबाट परिवर्तन ल्याउन बाध्य पा¥यौँ, प्राप्त अधिकारको रक्षा गर्दै बाँकी अधिकारका लागि सङ्घर्ष गर्न आमजनताले प्रतिनिधि सभामा मजबुत शक्ति बनाएर पठाउनु आवश्यक छ ।’ अध्यक्ष यादवले सप्तरी–३ बाट प्रतिनिधि सभा सदस्यका लागि उम्मेदावरी दिएका छन् । सौजन्य जनकपुर टुडे