फागुनको सुरुवातमै ४ नेपाली फिल्म आपसमा भिड्दै

काठमाडौँ । केही दिन लगातार सार्वजनिक बिदा पर्नासाथ निर्माता/ निर्देशकहरू आफ्नो फिल्म प्रदर्शनका लागि तँछाडमछाड गर्ने प्रचलन नेपाली फिल्म क्षेत्रमा नयाँ होइन । कहिलेकाहीँ प्रतिस्पर्धा यति तीव्र हुन्छ कि एउटै मितिमा चार–पाँच वटासम्म फिल्म भिड्छन् । आगामी फागुन १ गते पनि नेपाली बक्सअफिसमा एउटा ‘महायुद्ध’ हुने देखिएको छ । यो दिन ‘लालीबजार’, ‘शिवांश’, ‘बिगुल’ र ‘श्री बुकुरो’ प्रदर्शनको तयारीमा छन् ।

२ गते शनिबार, ३ गते महाशिवरात्रि, ६ गते ग्याल्पो ल्होछार र ७ गते प्रजातन्त्र दिवसको अवसरमा गरी चार दिन सार्वजनिक बिदा परेको छ । यही मौका छोपेर फागुनको पहिलो साता निर्माता–निर्देशकहरू आफ्नो फिल्म प्रदर्शनको तयारीमा जुटेका हुन् । फागुन १ मै प्रदर्शन हुने भनिएको फिल्म ‘कल्ली’ले भने देशको राजनीतिक अवस्था र चुनावको कारण भन्दै प्रदर्शन स्थगित गरिसकेको छ । ‘लालीबजार फिल्मलाई ‘जात्रा’ शृङ्खला र ‘महापुरुष’ जस्ता सफल फिल्म दिएको षट्कोण आट्र्सले निर्माण गरेको हो । अभिनेत्री स्वस्तिमा खड्काको मुख्य भूमिका रहेको फिल्म यम थापाले निर्देशन गरेका हुन् ।
लेखनसमेत निर्देशक थापाकै रहेको फिल्मलाई रवीन्द्रसिंह बानियाँ, म्याक्स दीपेश खत्रीले निर्माण गरेका हुन् । फिल्मका कार्यकारी निर्माता प्रदीप भट्टराई छन् ।

‘शिवांश’ पनि महाशिवरात्रिको अवसर पारेर फागुन १ मा प्रदर्शनमा आउन लागेको हो । फिल्ममा अभिनेता प्रवीण खतिवडाको मुख्य भूमिका छ । सन्तोष कुमार आत्रेयको निर्देशन रहेको फिल्म अञ्जान सिनेमा प्रोडक्सन हाउसको प्रस्तुतिमा बनेको हो । फिल्ममा प्रवीणका अलावा तेज गिरी, रुषा न्यौपानेको पनि अभिनय छ । फिल्म शिवको कथामा निर्माण भएको बताइन्छ । फिल्ममा न्ह्यू बज्राचार्य र राजनराज शिवाकोटीको सङ्गीत छ ।

त्यस्तै ‘बिगुल’ पनि फागुन १ मा आउन लागेको छ । यो फिल्म माघ ९ मा प्रदर्शन हुने भनिए पनि सरेर फागुनमा पुगेको हो । समसामयिक राजनीतिक र सामाजिक मुद्दामा आधारित फिल्म रमेश कोइरालाले निर्देशन गरेका हुन् । फिल्मले जेनजी पुस्ताको आन्दोलन र भ्रष्टाचार विरुद्धको आवाजलाई चित्रण गरेको छ । फिल्मका निर्माता दिनेश कोइराला हुन् । फिल्ममा बेनिशा हमाल, नरेन खड्का, रमेश बुढाथोकी, नीर शाह र सरोज खनाल लगायतको अभिनय छ ।

‘श्री बुकुरो ः द होम कलिङ’ले पनि फागुन १ लाई नै आफ्नो प्रदर्शन मिति तोकेको छ । ‘श्री बुकुरो’ ले एउटा शुद्ध पारिवारिक कथा लिएर प्रवेश गर्दैछ । फिल्मको निर्देशन सुदीप भुपाल सिंहले गरेका हुन् । फिल्मले हराउँदै गएको पारिवारिक मूल्य र घर फर्कने चाहनालाई समेत समेटेको निर्देशक सिंहले बताए । फिल्ममा लक्ष्मी गिरी, आशीर्वाद क्षेत्री र निकिता आचार्य लगायतका कलाकारको अभिनय छ । फिल्ममा रञ्जित गजमेर र वसन्त सापकोटाको सङ्गीत छ ।

चुनावको कारण स्थगित ‘कल्ली’ फागुन १ को यो महाभिडन्तमा सामेल हुने भनिएको फिल्म ‘कल्ली’ले भने अन्तिम समयमा आएर आफूलाई अलग बनाएको छ । निर्माण संस्था लेकाली इन्टरटेनमेन्टले विज्ञप्ति जारी गर्दै चुनावको कारण फिल्मको प्रदर्शन स्थगित गरेको जानकारी दिएको हो । लेकाली इन्टरटेनमेन्टले जारी गरेको विज्ञप्तिमा भनिएको छ, ‘देश निर्वाचनमा होमिएको बेला नागरिकको ध्यान राजनीति र राष्ट्रको भविष्यतर्फ हुनु स्वाभाविक हो ।’ ४ फिल्म एकैसाथ जुध्दा हुने व्यापारिक नोक्सानी र राजनीतिक माहोलका कारण ‘कल्ली’ पछि हट्नुलाई बुद्धिमानीपूर्ण निर्णय भनेर पनि विश्लेषण गरिएको छ । फिल्ममा सौगात मल्ल, बेनिशा हमाल र नाजिर हुसेनको मुख्य अभिनय छ । सौजन्य रातोपाटी