एमाले गण्डकी अधिवेशन : अझै सुरु हुन सकेन मतदान

केन्द्रीय सदस्य खगराज अधिकारीको समर्थनमा अध्यक्ष बन्ने दौडमा रहेका मायानाथको प्यानलबाट उपाध्यक्षमा बाबुराम विक, सचिवमा रश्मि आचार्य, महिला उपसचिवमा मीना गुरुङ र खुला उपसचिवमा सन्तोष रावलले उम्मेदवारी दर्ता गरेका छन् । लेखा आयोग अध्यक्षमा रामबहादुर जिसी, उपाध्यक्षमा शिवजी पौडेल र सचिवमा वैकुण्ठनाथ आचार्यले उम्मेदवारी दिएका निर्वाचन समितिले जनाएको छ ।

अधिवेशन अन्तर्गत २७ सदस्य निर्विरोध निर्वाचित भैसकेका छन् । निर्विरोध भएकामध्ये ६ जना अधिकारी प्यानलका छन् भने बाँकी शर्मा प्यानलका रहेको दाबी गरिएको छ । अधिकारी प्यानलका कार्यकर्ताहरू भने त्यसलाई स्विकार्दैनन् । निर्विरोध भएका मध्ये अधिकांश पद्मा अर्याल पक्षको भएको र अर्यालको समर्थन अधिकारीलाई रहेको दाबी उनीहरूको छ ।

एमाले गण्डकीले १ सय ६५ सदस्यीय नयाँ कमिटी गठन गर्नेछ । दुवै पक्ष अध्यक्ष केपी शर्मा ओली पक्षधर भए पनि प्रदेशमा छुट्टाछुट्टै गुट निर्माण भएको छ ।

शर्माले समर्थन पाएका पिएस केन्द्रमा विष्णु पौडेलसँग जोडिएका छन् भने अधिकारीले समर्थन पाएका खगराज केन्द्रमा शङ्कर पोखरेलसँग जोडिएका छन् । त्यसैले गण्डकीको अधिवेशनबाट शङ्कर र विष्णुको शक्ति प्रमाणित हुने एमाले वृत्तमा चर्चा छ । विद्युतीय मतदान हुने भएकाले परिणाम आउन समय लाग्दैन । रातोपाटी संवाददाता