यी हुन् विश्वमा सर्वाधिक लोकप्रिय १० इन्टरनेट सर्च इन्जिन

इन्टरनेटको दुनियामा सर्च इन्जिनहरु ऋाम प्रयोगकर्ताको जिज्ञासा मेटाउने ज्ञान र सूचनाका भण्डार बनेका छन् । हामीले सर्च इन्जिन भन्ने बित्तिकै गुगललाई पर्यावाची जस्तै ठान्छौं । तर इन्टरनेटको दुनियाँमा केवल गुगल मात्रै एक्लो सर्च इन्जिन होइन ।

गुगल र बिंगका अलावा अन्य धेरै सर्च इन्जिनहरु पनि अस्तित्वमा छन्, जसको नाम तपाईंले खासै नसुन्नुभएको हुनसक्छ तर दैनिक दशौं लाखले ती प्लाटर्फम प्रयोग गर्दछन् ।

इन्टरनेटको दुनियाँमा दर्जनौं सर्च इन्जिन अस्तित्वमा रहेका भए पनि गुगल अकन्टक बादशाह हो । गुगलको बजार हिस्सा ९१.५८ प्रतिशत रहँदा दोस्रो स्थानको बिंगको बजार हिस्सा केवल ३.०१ प्रतिशत मात्रै छ ।

लोकप्रियताको आधारमा विश्वका शीर्ष १० सर्च इन्जिन यी हुन् :

गुगल
माइक्रोसफ्ट बिंग
याहु
बाइडु
यान्डेक्स
डकडकगो
आस्क डटकम
इकोसिया
एओल डटकम
इन्टरनेट आर्काइभ

स्टाटिस्टाको तथ्यांक अनुसार डेस्कटप, मोबाइल तथा ट्याबलेट सबै प्लाटर्फममा गुगल नै सर्वाधिक लोकप्रिय सर्च इन्जिनको रुपमा रहेको छ ।

डेस्कटपमा गुगलको बजार हिस्सा ८१.७४ प्रतिशत रहँदा मोबाइलमा ९५.४९ प्रतिशत रहेको छ । गुगलमा दैनिक करिब साढे ३ अर्ब वटा सर्च गरिन्छन् भने गुगलमा सयौं टेराबाइट सूचना संग्रहित छ ।

दोस्रो स्थानको माइक्रोसफ्ट बिंगको बजार हिस्सा डेस्कटपमा १०.५२ प्रतिशत र मोबाइलमा ०.५३ प्रतिशत छ ।

सर्च इन्जिनको बजारमा तेस्रो स्थानमा रहेको याहुको बजार हिस्सा डेस्कटपतर्फ २.८ प्रतिशत र मोबाइलतर्फ ०.४८ प्रतिशत रहेको छ भने चौथो स्थानको यान्डेक्सको बजार हिस्सा डेस्कटपमा २.३५ प्रतिशत र मोबाइलमा १.३९ प्रतिशत रहेको छ ।

तथ्यांक अनुसार अर्को सर्च इन्जिन डकडकगोको बजार हिस्सा डेस्कटपतर्फ ०.८४ प्रतिशत र मोबाइलमा ०.४४ प्रतिशत छ बाइडुको बजार हिस्सा डेस्कटपमा ०.८४ प्रतिशत र मोबाइलमा १.०३ प्रतिशत रहेको छ ।

त्यसैगरी इकोसियाको बजार हिस्सा ०.१० प्रतिशत र एओएल डटकमको ०.०५ प्रतिशत रहेको छ । अन्तिम स्थानमा चाहिं गैरनाफामूलक सर्च इन्जिन इन्टरनेट आर्काइभ रहेको छ । अनलाइन खबर