मलंगवामा ईद मिलन उर्दू कवि सम्मेलन सम्पन्न

लोकतन्त्र समाचारदाता—-
मलंगवा, सर्लाही २७
सर्लाहीको सदरमुकाम  मलंगवामा “ईद मिलन उर्दू कवि सम्मेलन” भव्य रूपमा सम्पन्न भएको छ। दबिस्तान ए-नेपालको आयोजनामा भएको सो कार्यक्रम बुधबार मलंगवा स्थित होटल सुजातामा सम्पन्न भएको हो।
कार्यक्रममा पूर्व उपप्रधानमन्त्री राजेन्द्र महतो,पुर्व मन्त्री मोहम्मद रिजवान अन्सारी,प्रदेश सांसद विमला अन्सारी ,पुर्व संघीय सांसद रुहीनाज मिकरानी,मलंगवा नगरपालिकाका पुर्व उपमेयर शान्ती शबनम मिकरानी, मलंगवा नगरपालिका वडा नं. ९ का वडाअध्यक्ष चन्देश्वर राय, वडा न-३ का वडाअध्यक्ष प्रमोद राय,राष्ट्रिय योजना आयोगका पुर्व सदस्य डा.अब्दुल रहिम मिकरानी ,मेयर प्रत्यासी शमिमबाबु खान लगायत विभिन्न संघसंस्थाका प्रतिनिधि ,स्थानीय समाजसेवी ,पत्रकार तथा साहित्यकारहरूको उल्लेख्य उपस्थिति रहेको थियो।
उर्दू भाषा र साहित्यको संरक्षण तथा प्रवर्द्धनका लागि आयोजना गरिएको कवि सम्मेलनमा विभिन्न स्थानबाट आएका उर्दू कविहरूले शायरी प्रस्तुत गरी दर्शक स्रोताको मन जितेका थिए। कविहरूले सामाजिक सद्भाव, प्रेम, भाइचारा तथा शान्तिका सन्देश दिने कविता वाचन गरेका थिए।
मलंगवा नगरपालिकाको आर्थिक सहयोगमा सम्पन्न भएको कार्यक्रमका आयोजक संस्था दबिस्तान ए-नेपालले भविष्यमा पनि यस्ता कार्यक्रमलाई निरन्तरता दिने प्रतिबद्धता जनाएको छ।