बम्बई उच्च अदालतले पतञ्जलि आयुर्वेदमाथि लगायो जरिवाना

भारतकाे बम्बई उच्च अदालतले योग गुरु बाबा रामदेवको कम्पनी पतञ्जलि आयुर्वेदलाई चार करोड रुपैयाँ भारुकाे जरिवाना लगाएको छ । अगस्त २०२३ मा दिएको आदेशको अवज्ञा गरेको भन्दै यो जरिवाना लगाएको हो । बम्बई उच्च अदालतले अगस्ट २०२३ मा पतञ्जलि आयुर्वेदलाई कपूर उत्पादनको बिक्रीमा प्रतिबन्ध लगाउन आदेश दिएको थियो ।

मंगलम अर्गानिक्सले गत वर्ष एक याचिका दायर गरी पतञ्जलिका कपूर उत्पादनहरूले यसको ट्रेडमार्क उल्लङ्घन गरिरहेको बताएको थियो । यस याचिकाको सुनुवाइ गर्दै उच्च अदालतले पतञ्जलिलाई कपूरका उत्पादनहरू बिक्री नगर्न आदेश दिएको थियो । अदालतको फैसलापछि पनि पतञ्जलिले कपूर उत्पादन बिक्री जारी राखेको निवेदकको दाबी छ ।

जुलाई २ मा पतञ्जलिले अदालतमा माफी माग्दै अदालतको फैसला पालना गर्ने बताएको थियो । तर कम्पनीले माफी मागे पनि कपूर उत्पादनको बिक्री जारी राखेको भन्दै उच्च अदालतले पतञ्जलिलाई ४ करोड रुपैयाँ जरिवाना तिर्न आदेश दिएको छ । अदालतले यो जरिवाना तिर्न पतञ्जलिलाई दुई साताको समय दिएको छ । यात्रा डेली