व्यवसायीमाथि चक्कु प्रहार प्रकरणमा तीन जना पक्राउ

पक्राउ पर्नेमा बुटवलमा फलफूल व्यवसाय गर्ने अब्दुल कादिर, कृष्ण केसी र लोकबहादुर कुँवर छन् । इलाका प्रहरी कार्यालयका बुटवलमा प्रमुख प्रहरी नायब उपरीक्षक दानबहादुर थापाले निर्माण व्यवसायी निर्मल खत्रीलाई कालिका पथमा घेरा हालेर कुटपिट गरी चक्कु प्रहार गर्नेमध्ये ३ जनालाई पक्राउ गरिएको र अन्यको खोजी भइरहेको बताए ।

निर्माणाधीन बुटवलको कालिका पथ सडकमा काली गण्डकी निर्माण कम्पनीका सञ्चालक डीबी खत्रीले सडक पिच गर्नका लागि कालोपत्रे लगाएर राखेका थिए । उक्त कालो पत्रे सडकमा स्थानीय व्यापारी अब्दुल कादरीले फलफूल बोकेको ट्रक चढाएपछि सडक भत्किएपछि भएको विवाद बढेर सांघातिक आक्रमणसम्म पुगेको प्रहरीको भनाइ छ ।

निर्माण व्यवसायी खत्रीले कादरीलाई भत्किएको सडकको क्षतिपूर्ति दिन माग गरेपछि कादिरले रकम लिन घरमा बोलाएका थिए । सहमति अनुसार रकम लिन गएका खत्रीका छोरा निर्मल खत्रीलाई कादिरले तीन दर्जन युवा बोलाएर कुटपिट गर्दै चक्कु प्रहार गरेका थिए ।

त्यस क्रममा स्थानीयले सटरमा लुकाएर खत्रीलाई बचाएका थिए । घाइते खत्रीको उपचार भइरहेको जनाइएको छ । फरार अभियुक्तको खोजी कार्य भइरहेको प्रहरी नायब उपरीक्षक थापाले बताए ।