नेतृत्व परियोजनाले खुलेर बोल्न सिकाएको बलराका दलित महिला र किशोरीहरुको भनाई

लोकतन्त्र समाचारदाता—
सर्लाही,पुस १५
सर्लाहीको बलरा नगरपालिकामा सेभ द चिल्ड्रेन र राष्ट्रिय रोजगार प्रबद्र्धन केन्द्र मलंगवा,सर्लाहीको सहकार्यमा संचालित नेतृत्व परियोजना बिहीबार एक कार्यक्रमका बिच समापन गरिएको छ।
समापन कार्यक्रममा संस्थाले  परियोजना सँग आबद्ध बलरा न.पा का २५ जना दलित महिला तथा किशोरीहरुले परियोजनाबाट सिकेका विभिन्न विषय बस्तुहरुको आधारमा तयार पारिएका १२ बूंदे घोषणा पत्र जारी गरेका थिए। परियोजना सँग आवद्ध दलित महिला तथा किशोरीहरुले जारी गरिएको घोषणा पत्रमा उल्लेख गरिएका बुँदाहरु लाई पालना गर्ने प्रतिबद्धता सहित हस्ताक्षर गर्नुका साथै समुदायलाई पनि सचेत गराउन नेतृत्वदायी भूमिका निर्वाह गर्ने प्रतिबद्धता जाहेर गरेका थिए ।
कार्यक्रममा नगर प्रमुख रामाशंकर प्रसाद कुश्वाहाले कार्यक्रम समापन भएपनि परियोजना सँग आवद्ध २५ जनामध्ये बाट १२ पास गरेका ५ जना  सहभागीहरुलाई  प्रौढ शिक्षा कक्षा संचालनका लागि अवसर दिने, साथै उनीहरुको समुह गठन गरि दर्ता गराई सिपमूलक आयआर्जनका कार्यक्रमहरु संचालन गरि प्राथमिकताका साथ अवसर दिने  प्रतिबद्धता जनाएका थिए।
परियोजनामा आबद्ध  सहभागीहरुका अनुसार “ परियोजना बाट आफुहरुलाई धेरै फाइदा भएको छ।यसअघि सार्वजनिक कार्यक्रमहरुमा खुलेर बोल्न नसक्ने,आफ्नो परिचय र कुराहरु व्यक्त गर्न नसक्ने महिला र किशोरीहरु कार्यक्रममा आबद्ध भए पश्चात आफ्ना कुराहरु व्यक्त गर्न सक्ने भएको उनीहरूले बताए।