बीबीसीको डकुमेन्ट्री प्रसारण गर्ने गाडीसहित एक पक्राउ

बीबीसीद्वारा तयार पारिएको ‘जेनजी आन्दोलन’ सम्बन्धी डकुमेन्ट्री जनकपुरधाममा प्रदर्शन गरिरहेका एक व्यक्तिलाई प्रहरीले नियन्त्रणमा लिएको छ । जिल्ला प्रहरी कार्यालय धनुषा जिल्लाका अनुसार भारतीय नम्बर प्लेटको सवारीसाधन प्रयोग गरी सार्वजनिक स्थानमा उक्त सामग्री प्रसारण भइरहेको अवस्थामा कारबाही गरिएको हो । प्रहरी प्रवक्ता डीएसपी गणेश बमका अनुसार बी.आर ०१ जी ०१४६७ नम्बरको गाडीमा प्रोजेक्टर जडान गरी जनकपुरधामस्थित रेल्वे स्टेशन अगाडि डकुमेन्ट्री देखाइँदै थियो । सोही क्रममा गाडीमा रहेका राष्ट्रिय स्वतन्त्र पार्टी (रास्वपा) का कार्यकर्ता विकास जयसवाललाई पक्राउ गरिएको प्रहरीले जनाएको छ ।

प्रहरीका अनुसार निर्वाचन आचारसंहिता लागू भइसकेको अवस्थामा विदेशी नम्बर प्लेटको गाडी प्रयोग गरी संवेदनशील विषयवस्तु सार्वजनिक रूपमा प्रदर्शन गर्नु नियमविपरीत हुन सक्ने देखिएकाले नियन्त्रणमा लिइएको हो । साथै, यस्तै प्रकृतिका थप दुईवटा गाडी प्रयोगमा रहेको सूचना प्राप्त भए पनि ती सवारीसाधन हाल फेला नपरेको प्रहरीले जनाएको छ । डीएसपी बमले चुनाव नजिकिँदै गरेको अवस्थामा यस्ता गतिविधिले मतदातामा नकारात्मक असर पार्न सक्ने तथा सामाजिक सद्भावमा प्रभाव पर्न सक्ने गुनासो आएपछि प्रहरी टोलीले खोजी तीव्र पारेको र स्टेशन क्षेत्रमा गाडी फेला पारेको जानकारी दिए । प्रहरीले घटनाबारे थप अनुसन्धान जारी राखेको जनाएको छ । सौजन्य जनकपुर टुडे