हरिपुर(पिडारी)मा ओभरहेड ट्याङ्की निर्माण सुरु भएको झण्डै सात वर्ष पछि बल्ल पुग्यो जनताको घरमा खानेपानी

मनोज यादव—
सर्लाही,जेठ २८

खानेपानीको समस्या सामाधाका लागि सर्लाहीको हरिपुर नगरपालिका वडा न-९ मा झण्डै सात वर्षदेखि बन्दै आएको ओभरहेड ट्याङ्कीको निर्माण कार्य सम्पन्न भएपछि बल्ल ८६६ घरधुरीमा खानेपानी खानेपानीको सुविधा पुगेको छ ।

प्रत्येक वर्ष गर्मीको मौसममा हैण्ड पम्प ,ईनार लगायत पानीको मुहानहरु सुकेर खानेपानीको समस्या झेल्दै आएका स्थानीयहरुको लागि पिडारी खानेपानी आयोजना मार्फत १६८ मिटर गहिरो र २०० घन मिटर क्षमताको ओभरहेड ट्याङ्की निर्माण गरी प्रत्येक घरधुरीमा धारा वितरण गर्न सुरु गरिएको हो ।

उक्त खानेपानी आयोजनाको मधेश प्रदेश सरकारकी नवनियुक्त उर्जा, सिँचाई तथा खानेपानी मन्त्री बेची लुङ्गेलीले औपचारिक रुपमा उद्घाटन गरेकी छिन् ।

मन्त्री लुङ्गेलीले आफ्नो निर्वाचन क्षेत्रमा रहेका खानेपानीको अधुरा योजनाहरु पूरा गरेर प्रत्येक नागरिकको घरघरमा खानेपानीको सुविधा पुर्याउने आफ्नो पहिलो प्राथमिकता रहेको बताईन् ।

नेपाल सरकारको ५० लाख ५० हजार, दातृ संस्था अक्सफाम र बागमती सेवा समाज नेपालको तीन करोड ७९ लाख ८३ हजार ७८५ रुपैयाँ र जनसहभागिताको ३३ लाख १८ हजार ८५० रुपैयाँको लागतमा उक्त खानेपानी आयोजना सम्पन्न गरिएको खानेपानी उपभोक्ता समितिका अध्यक्ष शिवनाथ साहले जानकारी दिए ।

उनले २०७५ सालबाट सुरु भएको खानेपानी आयोजनाको काम भर्खरै पूरा गरेर घरघरमा खानेपानी वितरण गर्न सुरु गरिएको बताए । पानीलाई शुद्ध र सफा बनाउनका लागि अत्याधुनिक उपकरण समेत जडान गरिएकाे संस्थाले जनाएकाे छ ।