बिली जिन किङ कप टेनिसमा नेपालको लगातार दोश्रो जित

काठमाडौं कात्तिक ३, नेपाली महिला टेनिस टोलीले बिली जिन किङ कपअन्तर्गत एसिया-ओसिएना ग्रुप ३ को प्रतियोगितामा बिहीबार लगातार दोश्रो जित हात पारेको छ ।

दोस्रो खेलमा नेपालले टिम इभेन्टमा ब्रुनाइलाई ३–० ले पराजित गर्‍यो  ।

यसअघि पहिलो दिन नेपालले ताजाकिस्तानलाई पनि ३–० ले नै हराएको थियो ।

पहिलो सिंगल्समा नेपालकी सुनिरा थापाले मिङ रुइ चोङलाई ६–० र ६–१ तथा दोश्रो सिंगल्समा नेपालकी अभिलाषा विष्टले जिया हुइ तानलाई ६–० र ६–० कै सोझो सेटमा पाखा लगाए ।

डबल्समा नेपालका अभिलाषा र माहिका राणाको जोडीले  मिङ र एड्रियना सिमको जोडीलाई सीधा सेटमा ६–० र ६–० ले पन्छाए ।

समूह चरणको अन्तिम खेलमा नेपालले शुक्रबार कतारसँग खेल्ने छ । अनलाइन खबर