सर्लाहीमा छठ पर्वको तयारी तिब्र, नदी तथा जलाशयहरु सिंगारिँदै,बजारमा किनमेल गर्नेहरुको भिड

मनोज यादव— सर्लाही,कात्तिक २०

नेपालीहरुको दोस्रो ठूलो चाड तिहार सकिएसँगै सर्लाही लगायत तराईका जिल्लामा छठको रौनक सुरु भएको छ ।

कात्तिक महिनाको शुक्लपक्षमा मनाइने छठ पर्वको लागि यतिबेला श्रद्धालु भक्तजनहरू पोखरी, नदी तथा जलायशहरु सजाउने काममा व्यस्त भएका छन् ।

ब्रतालु महिलाहरु छठको लागि आवश्यक पर्ने भुसबा,ठेकुवा,खजुरी आदी प्रसादका लागि चामल, गहुँ सुकाउने र घर आँगन सफाई तथा लिपपोतमा लागेका छन् भने पुरुषहरु छठ पुजाका लागि चाहिने सामाग्रीहरुको किनमेलमा लागेका छन् ।

बजारमा यतिबेला किनमेल गर्नेहरुको बाक्लो भिड लागेको छ। जिल्लाको सदरमुकाम मलंगवा नगरपालिका अन्तर्गतका वडाहरुमा रहेका पोखरीहरुको सरसफाइको काम तिब्र गतिमा भइरहेको छ।

वडा न-९, ८ र १० को वडा कार्यालय जनसागर पोखरी र झिम नदीको सरसफाईमा लागेका छन्। त्यस्तै वडा न-४,वडा न-५ भाँडसर, वडा न-६ खुटौना,वडा न-७ मुसैली,वडा न-१०,वडा न-२ ,वडा न-१ वडा न ११ र १२ गम्हरिया पनि आ-आफ्नो वडामा रहेका पोखरीहरुको सरसफाइमा जुटेका छन् ।यस कार्यमा स्थानीयबासी र युवा क्लव तथा संस्थाहरूले समेत सघाइ रहेका छन् ।

मलंगवा स्थित रहेका जनसागर पोखरी,शिवसागर पोखरी,मुर्ली पोखरी,झण्डा बजार पोखरी,झिम नदी सहितका पोखरीहरू र नदीको डिलमा छठ पूजाका लागि सजाउने काम भइरहेको छ ।

छठ पूजाका लागि मलंगवाका व्रतालुहरू राति पूजा स्थानमै बस्छन् भने केही व्रतालु साँझ घर फर्कछन् र भोलिपल्ट बिहानै घाटमा आएर उदाउँदो सूर्यलाई अर्घ्य दिने गरिन्छ ।

छठ पर्व मनाउँदा चर्म रोग, पुत्रलाभ,आर्थिक समवृद्धि तथा सुख शान्ति प्राप्त हुने जनविशवास रहेको छ । चार दिनसम्म मनाइने यो पर्वको पहिलो दिन मंगलबार नुहाई खाई, दोस्रो दिन अर्थात् बुधबार खरना, तेस्रो दिन बिहीबार अस्ताउँदै गरेको सूर्य र अन्तिम दिन शुक्रवार उदाँउदै गरेको सूर्यलाई अर्घ्य दिई यो पर्व समापन गरिन्छ ।

छठ पर्वमा अन्य सामाग्रीहरुको भन्दा केरा,स्याउ,अनार,सुन्तला ,उखु,भोगटे,कागती लगायतका फलफुलहरुको बढी खपत हुने गरेको छ। छठ पर्वका अवसरमा मधेस प्रदेश सरकारले कात्तिक २२ र २३ सार्वजनिक बिदा दिएको छ ।