ग्रामीण तथा सहायक सडकमा अन्न बाली सुकाउँदा दुर्घटनाको जोखिम

मनोज यादव—
सर्लाही,बैशाख १९

सरकारले सवारीसाधनहरुको सहज आवागमनको लागि करोडौं रकम खर्च गरेर बनाएको सडक स्थानीयले अन्नबाली सुकाउन र गाईबस्तु बाँध्ने काममा प्रयोग गर्न थालेका छन् ।

सर्लाही जिल्ला अन्तर्गतको हुलाकी राजमार्ग सँग जोड्ने ग्रामीण तथा सहायक सडकमा घान,गहुँ ,मकै लगायतका अन्नबाली सुकाउने स्थानीयहरु बिच होडबाजीनै चलेको छ ।

यसरी सडकमा असरल्ल अन्नबाली सुकाइँदा दुर्घटनाको जोखिम बढेको छ ।

जिल्लाको लगभग सबै ठाउँको सडक कालोपत्रे र ढलान भइसकेकोले ती सडकमा सवारीसाधन गुड्ने ठाउँ पनि नछोडी अन्नबाली सुकाउने गरिएकोले यसले सवारी दुर्घटनाको जोखिम बढाएको कबिलासी नगरपालिका गैर निवासी बस चालक मनोज कुमार साहले बताए ।

जिल्लाको अधिकांश भित्री सडकहरुमा स्थानीयले अन्नबालीको साथसाथै पराल, गाईबस्तुलाई ओछ्याउने पतिङ्गर समेत राख्ने गरेका छन् ।

घर आँगनमा सुकाउने ठाउँ नभएकोले सडक प्रयोग गर्ने गरेको स्थानीयको भनाइ छ।कालोपत्रे सडक एकैछिनमा तातिने तथा धान,गहुँ,मकै,दलहन लगायतका खाद्यान्न सुकाउन सजिलो हुने र छिट्टै सुक्ने भएकाले सडकको प्रयोग गरेको एकजना स्थानीय किसानले बताए।

यसरी अन्नबाली,पराल लगायतका बस्तुहरु सुकाउँदा र गाईबस्तु बाँध्दा सडक अवरुद्ध भई दुर्घटना हुन्छ भन्ने बारेमा जान्दाजान्दै पनि स्थानीयले यस्तो कार्य गर्दै आएका छन् ।

कतिपय स्थानमा स्थानीयहरुले सडकको आधा भन्दा बढी भाग कब्जा गरेर घर बनाउन गिट्टी, बालुवालगायतका निर्माण सामग्री थुपारेर राखेका छन् ।

यस्तो कार्य रोक्न वडा स्तरका जनप्रतिनिधिहरुलाई कडाइका साथ प्रस्तुत हुनपर्ने मानवअधिकारकर्मी मुकेश मिश्रको सुझाव छ।